Валюта курслари:

ЎзРВБда очилиш аукциони курси:

1 USD = UZS ()


18.08.2023

Ҳаракатдаги ҳамкорлик: ЎзРВБ ва ОТБ миссияси ўзаро ҳамкорликнинг янги истиқболларини муҳокама қилди

Ўзбекистон республика валюта биржасида (ЎзРВБ) Марказий Осиё минтақавий иқтисодий ҳамкорлиги (CAREC) капитал бозорлари иштирокчиларига техник ёрдам кўрсатиш бўйича Осиё тараққиёт банки (ОТБ) миссияси билан учрашув бўлиб ўтди.  

Учрашувда биржа бозорларини тартибга солиш, биржа жараёнларини янада рақамлаштириш, барқарор ривожланиш сиёсати лойиҳаларини амалга ошириш имкониятлари, шунингдек, Ўзбекистон капитали бозорини ривожлантириш масалалари муҳокама қилинди. 

Томонлар биржа савдолари соҳасида замонавий технологиялардан фойдаланиш ва мижозлар маълумотлари хавфсизлигини таъминлаш имкониятларини муҳокама қилди. ЎзРВБ раҳбари Рашид Усманов ЎзРВБда рақамлаштириш ва янги технологияларни жорий этиш соҳасида амалга оширилаётган ишлар тўғрисида маълумот берди.

Барқарор ривожланиш соҳасидаги лойиҳаларни амалга ошириш масаласи юзасидан Рашид Усманов ЎзРВБда барқарор ривожланиш сиёсатини, шу жумладан ESG тамойилларини жорий этиш йўналишида кўрилаётган чора-тадбирлар тўғрисида тўхталиб ўтди.

Ўз навбатида, ОТБ миссияси минтақавий капитал бозорларини тадқиқоти лойиҳасини ва келгуси ҳаракатлар бўйича умумий йўл харитасини тақдим этди.

ОТБнинг CAREC капитал бозорлари регуляторлари форумини қўллаб-қувватлаш бўйича техник ёрдами CAREC аъзоларига капитал бозори регуляторлари форумини яратиш дастлабки босқичида ҳамда фаолиятини бошлашда ёрдам беради.

Форум CАRЕC аъзо мамлакатларининг капитал бозорларини ривожлантириш йўлидаги минтақавий ҳамкорлик ва интеграция саъй-ҳаракатларини тажриба алмашиш, салоҳиятни ривожлантиришга кўмаклашиш, шунингдек ҳуқуқий ва меъёрий асосларни уйғунлаштириш орқали кучайтиришга қаратилган.

Учрашувда Ўзбекистон капитал бозорини янада ривожлантириш истиқболлари ҳам муҳокама қилинди. ЎзРВБ Бош директори инфратузилмани янада такомиллаштириш, инвестицияларни жалб қилиш ҳамда қулай инвестиция муҳитини яратиш воситаларини кенгайтириш муҳимлигини таъкидлади.  

ОТБ вакиллари барқарор ривожланиш, шунингдек, Ўзбекистон капитал бозорини ривожлантириш шароитида лойиҳаларни амалга ошириш учун техник ёрдам кўрсатиш ва қўллаб-қувватлашга тайёрлигини билдирди. Миссия вакиллари, шунингдек, Ўзбекистон бозори инвестицияларни жалб қилиш учун катта салоҳиятга эга эканлигига ишонч билдириб, бу мамлакатнинг барқарор ва жадал иқтисодий ўсишига ёрдам беришини таъкидлаб ўтди.

Учрашув якунида томонлар Ўзбекистоннинг молия тизимини модернизация қилиш ва фонд бозорини рағбатлантириш бўйича стратегик мақсадларига эришиш йўлида ЎзРВБ ва ОТБ ўртасидаги самарали ҳамкорлик муҳим аҳамиятга эканлигини таъкидладилар.

Поделиться новостью

Контакты пресс-центра

Копировать весь текст