Валюта курслари:
ЎзРВБда очилиш аукциони курси:
1 USD = UZS ()
18.08.2023
Clearstream ва ЎзРВБ қимматли қоғозлар бозорини ривожлантириш соҳасида ҳамкорлик қилишга келишишди
Ўзбекистон Республикаси Марказий банкида “Ўзбекистон республика валюта биржаси” АЖ Бош директори иштирокида Clearstream Banking S.A (Clearstream) вакиллари билан учрашув бўлиб ўтди.
Учрашувда Clearstream томонидан Глобал бозорлар бошқармаси раҳбари жаноб Ян Виллемс, савдолар бўйича менежер Угниус Славинскас ва ҳамкорлик бўйича менежер Мухаммаджон Икромов иштирок этди.
Учрашув давомида Clearstream вакиллари халқаро қимматли қоғозлар бозорларида ҳисоб-китоб инфратузилмасини яратиш, ушбу бозорда инвесторларга хизмат кўрсатиш ва илғор ҳисоб-китоб механизмларидан фойдаланиш бўйича ўз тажрибалари билан бўлишди.
Томонлар Clearstream ва ЎзРВБ ўртасидаги ўзаро ҳамкорликнинг мақбул шаклларини, шу жумладан компаниянинг хорижий инвесторлар номидан ЎзРВБ бозорларида иштирок этиши, SWIFT тизими орқали халқаро ҳисоб-китобларнинг самарали тизимини йўлга қўйиш, бунинг учун тегишли шарт-шароитларни яратиш ва келгусида амалга оширилиши лозим бўлган чора-тадбирларни муҳокама қилдилар.

Учрашув якунида Clearstream вакиллари ЎзРВБ томонидан республика капитал бозори инфратузилмасини такомиллаштириш ҳамда норезидентларнинг ЎзРВБ бозорларида иштирок этишлари учун қулай шароитлар яратиш бўйича олиб борилаётган саъй-ҳаракатларни қўллаб-қувватлаб, ўзаро манфаатли ҳамкорликни янада ривожлантиришга тайёр эканликларини билдирди.
Маълумот учун:
Clearstream халқаро миқёсда пост-савдо хизматларини тақдим этувчи ташкилот ҳисобланади. Ушбу компанияга мунтазам равишда АА кредит рейтинги берилиб, компания томонидан кўрсатиладиган хизматлар қаторига депозитарий ва ҳисоб-китоб хизматлари, шунингдек, қимматли қоғозлар орқали молиялаштириш киради.
Компанияда сақланадиган активлар миқдори 16,7 трлн. еврони ташкил этиб, ҳар куни 250 мингдан ортиқ ҳисоб-китоб операциялари амалга оширилади. Компания 110 та мамлакатда 2,5 мингдан ортиқ мижозларга хизмат кўрсатади.





