Валюта курслари:
ЎзРВБда очилиш аукциони курси:
1 USD = UZS ()
08.02.2024
ЎзРВБдан янгилик: валютавий фьючерс бозори узоқ муддатли воситалар билан кенгайтирилди
2024 йил февраль ойидан бошлаб Ўзбекистон республика валюта биржаси (ЎзРВБ)нинг деривативлар бозори янги инструментлар - 6, 9 ва 12 ойлик валютавий фьючерс шартномалари билан тўлдирилди.
Валютавий фьючерслар ўзи нима?
Валютавий фьючерслари - бу келажакда валютани олди-сотди шартномаси бўлиб, унга кўра сотувчи келажакда маълум миқдордаги валютани битимда белгиланган курс бўйича сотиш, харидор эса сотиб олиш мажбуриятини олади.
Аввалроқ, ЎзРВБ мамлакатимизда биринчи бўлиб амал қилиш муддати 1, 2 ва 3 ой бўлган қисқа муддатли валютавий фьючерс шартномалари савдосини йўлга қўйган эди. Эндиликда фьючерс инструментлар қатори узоқ муддатли фьючерслар билан тўлдирилди.
Янги инструментларни жорий этишдан мақсад нима?
ЎзРВБ савдо иштирокчиларининг фикр ва таклифларини инобатга олган ҳолда биржа савдоларида иштирок этиш учун зарур қулай шарт-шароитларни яратиб келмоқда.
Узоқ муддатли фьючерс шартномаларининг жорий этилиши активларни бошқаришдан, шу жумладан давлат қимматли қоғозлар бозорида (ДҚҚ) даромад оладиган ва ўз даромадларини турли воситалар орқали ҳимоя қилмоқчи бўлган савдо иштирокчилари ва инвесторларнинг таклифларини ўрганиш асосида амалга оширилди.
Таъкидлаш жоизки, узоқ муддатли фьючерслар жорий қилингунга қадар трейдерлар валютавий фьючерс шартномалари бўйича позицияларини олти ой ёки бир йилга узайтириш учун қисқа муддатли фьючерслар бўйича янги позицияларни очишга мажбур бўлишган. Эндиликда трейдерлар валютавий фьючерс шартномаси бўйича позицияларни узоқроқ муддатга - бир йилгача очиш имкониятига эга.
Фьючерс шартномаларининг афзалликлари нимада?
Келажакка ишонч. Савдо иштирокчиси валюта курси бўйича фьючерс шартномасини тузиш орқали, курс ўзгариши ҳақида қайғурмасдан, уни олдиндан белгилаган ҳолда барқарор нарх кафолатини олади.
Даромад олиш учун янги имкониятлар. Фьючерс шартномалари нафақат хатарларни ҳимоя қилиш инструменти, балки валюта курси ўзгариши натижасида даромад олиш воситаси ҳисобланади.
Статистика:
- 2023 йил якунларига кўра ЎзРВБда 3000 та фьючерс шартномалари тузилди.
- Битимларнинг умумий миқдори 3,000,000 АҚШ долларини ташкил этди.
- ЎзРВБ фьючерс шартномаларининг базавий активи АҚШ долларининг сўмга нисбатан курси ҳисобланади.





