Валюта курслари:

ЎзРВБда очилиш аукциони курси:

1 USD = UZS ()


13.04.2026

ЎзРВБда UDEA талабалари билан UZCE trading lab тадбири ўтказилди

Ўзбекистон республика валюта биржаси (ЎзРВБ)да UZCE trading lab таълим лойиҳаси бўйича тадбир бўлиб ўтди. Тадбир талабаларнинг молиявий саводхонлигини ошириш ва уларни молия бозорлари фаолиятининг амалий жиҳатлари билан таништиришга қаратилди. Тадбирда Рақамли иқтисодиёт ва агротехнологиялар университети (UDEA) турли босқичларида таҳсил олаётган 30 га яқин талаба иштирок этди.
Тадбирни очиб берар экан, ЎзРВБ Таълим маркази бошлиғи Билолиддин Исроилов ёшларни молия тизими ва биржа инфратузилмасини ўрганишга жалб этишнинг муҳимлигини қайд этди. Шунингдек, у бундай учрашувлар талабаларда амалий билим ва касбий йўналишларни шакллантиришда катта аҳамиятга эга эканини алоҳида таъкидлади.

Дастурнинг асосий қисмида ЎзРВБ Бош маклери Адҳам Асқаровнинг тақдимоти ўрин олди. У ўз чиқишида биржа фаолияти, унинг мамлакат молия тизимидаги ўрни, савдоларни ўтказиш механизмлари ҳамда турли бозорларнинг фаолият юритиш хусусиятлари ҳақида батафсил сўзлаб берди. Биржа савдоси тамойиллари, бозор иштирокчилари ва операцияларда қўлланиладиган воситаларга алоҳида эътибор қаратилди. Шунингдек, молия секторини ривожлантириш ва биржа инфратузилмасининг умуман иқтисодиёт учун аҳамияти масалаларига ҳам тўхталиб ўтилди.

Тақдимотнинг асосий қисмидан сўнг савол-жавоблар сессияси бўлиб ўтди. Унда талабалар биржа мутахассиси билан бевосита мулоқот қилиб, биржа фаолиятининг амалий жиҳатлари бўйича тушунтиришлар олиш имкониятига эга бўлдилар. Тингловчиларнинг жонли қизиқиши ва муҳокамадаги фаол иштироки талабаларнинг молия ва инвестициялар мавзусига нечоғли қизиқишини яққол намоён этди.

Тадбирнинг кейинги қисми интерактив шаклда ўтди. Қисқа танаффусдан сўнг иштирокчилар учун молиявий мавзуда квиз ташкил этилди. Унда талабалар иқтисодиёт ва молия соҳасидаги бошланғич ҳамда чуқур билимларга оид саволларга жавоб бериб, ўзларининг пухта тайёргарлиги ва мантиқий фикрлашини намоён этдилар. Ўйин дўстона ва жонли муҳитда ўтказилиб, иштирокчиларнинг билимларини мустаҳкамлаш билан бирга, молиявий соҳага бўлган қизиқишини кучайтирди.

ЎзРВБ талабалар ўртасида молия тизими ҳақидаги билимларни оммалаштиришга қаратилган таълим дастурларини амалга оширишда давом этади.

Поделиться новостью

Контакты пресс-центра

Копировать весь текст