Валюта курслари:
ЎзРВБда очилиш аукциони курси:
1 USD = UZS ()
08.04.2026
UZCE Trading Lab: назария ва амалиёт уйғунлиги
Ўзбекистон республика валюта биржасида Ўзбекистон Республикаси Марказий банк билан ҳамкорликда ёш мутахассислар ва Марказий банк стипендиатларини бирлаштирган UZCE Trading Lab таълим ташаббусига старт берилди.
Лойиҳанинг асосий ғояси — молия бозорини ички тузилишини кўрсатиш, яъни унинг тузилмасини тушунтириш билан кифояланмасдан, бозор мантиғини амалда ҳис қилиш имкониятини тақдим этиш.
Тадбирни очиш маросимида ЎзРВБ Бош директори Рашид Усманов сўзга чиқди. Ўз мурожаатида у молия бозорининг ривожланиши тез ўзгарувчан иқтисодиёт шароитида тизимли фикрлай оладиган ва ишлай биладиган янги авлод мутахассисларини тайёрлаш билан бевосита боғлиқлигини таъкидлади. Ёш кадрларнинг касбий ўсиши учун платформа сифатида Марказий банк ва биржа ўртасидаги ҳамкорликнинг аҳамиятига алоҳида эътибор қаратилди.
Тадбирнинг назарий қисми доирасида иштирокчилар ЎзРВБ фаолияти, унинг мамлакат иқтисодиётидаги ўрни ҳамда биржа ривожланишининг асосий йўналишлари билан танишиб, биржа инфратузилмасининг ишлаш тамойиллари, савдоларда қатнашиш шартлари ва бозор билан ўзаро ҳамкорлик механизмларини батафсил кўриб чиқдилар.
Дастур доирасида амалиётга йўналтирилган асосий эътибор валюта ва пул бозорларини ўрганишга қаратилди, бунда иштирокчиларга бозор билан ишлашнинг тўлиқ цикли босқичма-босқич кўрсатиб берилди. Биржа мутахассислари аниқ амалий мисоллар орқали операцияларни амалга ошириш механизмлари ва битимлар шаклланишининг ички мантиғини изоҳлаб бердилар ҳамда савдо платформаларининг функционал имкониятларини намойиш этдилар.
Шундан сўнг тадбир иштирокчиларига аниқ бозор сценарийлари таклиф этилди. Унда қатнашчилар ўзларини трейдер ролида синаб кўриб, симуляция муҳитида реал вақт режимида савдо қарорлари асосида битимлар туздилар. Ҳар бир ҳолат бўйича Марказий банк ва ЎзРВБ мутахассислари иштирокчилар томонидан қабул қилинган қарорларни таҳлил қилиб, бозор мантиғи ва молиявий инструментлар билан ишлашнинг амалий ёндашувларини чуқурроқ англаш учун ўз профессионал шарҳ ва тавсиялари билан ўртоқлашдилар.
Молиявий-иқтисодий мавзудаги интерактив викторина тадбирга мусобақа руҳини бағишлади. Иштирокчилар юқори даражадаги тайёргарлик ва фаолликни намойиш қилдилар ва уч нафар ғолиб ЎзРВБнинг эсдалик совғалари билан тақдирланди.
UZCE Trading Lab шунчаки таълимий учрашув бўлиб қолмасдан, амалий кўникмаларга йўналтирилган янги форматдаги тадбирлар бошланишига замин яратди. Ушбу дастлабки сессия молия-иқтисодиёт соҳасига ихтисослашган олий таълим муассасалари талабалари учун мунтазам ўтказиладиган дастурларга асос солди. Мазкур ташаббус замонавий молиявий инструментлар ва бозор инфратузилмаси билан ишлай оладиган мутахассислар авлодини шакллантиришга қаратилган.





