Валюта курслари:
ЎзРВБда очилиш аукциони курси:
1 USD = UZS ()
21.04.2026
Биржада карьерани қандай бошлаш мумкин?
ЎзРВБ “Карьера куни”да ёш мутахассислар учун мавжуд имкониятлар ҳақида сўзлаб берди
Ўзбекистон республика валюта биржаси (ЎзРВБ) International School of Finance Technology and Science университетида бўлиб ўтган “Карьера куни” вакансиялар ярмаркасида иштирок этди.
Ушбу тадбир талабалар ва ёш мутахассислар учун иш берувчилар билан бевосита мулоқот қилиш, шунингдек молия соҳасида муваффақиятли карьерани қандай йўлга қўйиш мумкинлигини чуқурроқ тушуниш имкониятини яратди.
Ярмаркада банклар, ишлаб чиқариш корхоналари, суғурта ташкилотлари, кадрлар агентликлари ҳамда телекоммуникация соҳаси вакиллари иштирок этди. Иштирокчилар ўз фаолият йўналишлари, мавжуд бўш иш ўринлари ва касбий ривожланиш имкониятлари ҳақида кенг маълумот бердилар.
ЎзРВБ стенди талабалар ўртасида катта қизиқиш уйғотди. Улар томонидан берилган саволлар ишга жойлашиш шартлари билан чекланиб қолмай, биржа фаолияти, карьера имкониятлари ва номзодларга қўйиладиган талабларни ҳам қамраб олди.
ЎзРВБ Таълим маркази бошлиғи Билолиддин Исраилов стажировка ва амалиёт дастурлари, касбий ўсиш имкониятлари ҳақида маълумот бериб, ёш мутахассисларга молия соҳасида самарали фаолият бошлаш бўйича амалий тавсиялари билан ўртоқлашди.
Тадбир якунларига кўра ЎзРВБ ёшларнинг касбий йўналишини ривожлантиришга қўшган ҳиссаси учун ташаккурнома билан тақдирланди.
Бундай ташаббусларда иштирок этиш ЎзРВБнинг замонавий молиявий инструментлар ва бозор инфратузилмаси бўйича билим ва кўникмаларга эга бўлган янги авлод мутахассисларини шакллантиришга қаратилган тизимли ишларининг ажралмас қисми ҳисобланади.





