Валюта курслари:
ЎзРВБда очилиш аукциони курси:
1 USD = UZS ()
06.11.2023
“One Click”: ҳисоб-китоблар автоматлаштирилган, инсон омили мавжуд эмас
Ўзбекистон республика валюта биржаси (ЎзРВБ) экспертлар жамоаси биржа фаолиятидаги ўзаро ҳисоб-китоблар тизимига янгича назар ҳисобланмиш “One Click” инновацион лойиҳасини ишга туширди. Ушбу лойиҳа ЎзРВБда биржа савдолари иштирокчилари учун янги истиқболларни очиб беради ва РEПО бозорида битимлар тузишни анча осонлаштириб, уларнинг самарадорлиги ва шаффофлигини оширади.
“One Click” – давлат қимматли қоғозлари (ДҚҚ) РEПО бозорида тузилган битимлар бўйича тўлов ҳужжатларини шакллантириш ва юбориш жараёнини автоматлаштирувчи уникал тизимдир.
Илгари, РEПО бозорида битимлар тузилгандан сўнг, ҳар бир битим бўйича ўзаро ҳисоб-китобларни амалга ошириш жараёни 1 соатгача давом этган бўлиб, жараёнда камида 3 киши иштирок этган. Бундан ташқари, савдо иштирокчилари сотиб олинган давлат қимматли қоғозлари учун пул маблағларини юборишдан олдин кўплаб ҳужжатларни тайёрлаш заруратига дуч келишган.
“One Click” тизими туфайли жараёнлар анча соддалаштирилди. ДҚҚ харидорининг пул маблағлари автоматик равишда банкнинг вакиллик ҳисобварағидан ечиб олинади ва ЎзРВБ мутахассислари томонидан тасдиқлангандан сўнг, сотувчининг ҳисоб рақамига бир неча дақиқа ичида туширилади.
Шундай қилиб, банк томонидан қарорларни қабул қилиш жараёни осонлашиб, битимлар тузиш тезлиги ошади ва пул ўтказишда хатолар хавфи камаяди.
Рақамлар ҳам шундан далолат беради – 2023 йилнинг 1-чорагида РEПО бозорида 1,87 триллион сўмлик битимлар тузилган бўлса, жорий йилнинг 9 ой якунларига кўра РEПО битимлари ҳажми 1-чорак кўрсаткичларига нисбатан 24 баробар кўпайиб, 44,86 триллион сўмни ташкил этди.
“One Click” ЎзРВБнинг ДҚҚ бозори инфратузилмасини модернизация қилиш бўйича кенг кўламли лойиҳасининг бир қисми ҳисобланади. Мазкур лойиҳа доирасида яқин келажакда савдо иштирокчилари учун янги савдо имкониятларини, шу жумладан, ЎзРВБ платформасида стандартлаштирилган муддатлар кесимида РEПО саватини жорий этиш кўзда тутилмоқда.
“One Click”нинг ишга туширилиши ЎзРВБ бозорларининг жозибадорлиги ва рақобатбардошлигини оширишга қаратилган. Унинг ёрдамида ЎзРВБ платформаси савдоларида қатнашиш янада осонроқ, тезроқ ва арзонроқ бўлмоқда.





