Валюта курслари:

ЎзРВБда очилиш аукциони курси:

1 USD = UZS ()


03.05.2024

МИЛЛИЙ КЛИРИНГ МАРКАЗИ ФАОЛИЯТИНИ ЙЎЛГА ҚЎЙИШ ДОИРАСИДА АМАЛГА ОШИРИЛГАН ИШЛАР ТЎҒРИСИДА МАЪЛУМОТ

Ўзбекистон Республикаси Президентининг “Капитал бозорини ривожлантиришнинг қўшимча чора-тадбирлари тўғрисида”ги 291-сон қарорига асосан “Ўзбекистон республика валюта биржаси” акциядорлик жамияти таъсисчилигида “Миллий клиринг маркази” акциядорлик жамияти ташкил этилди. 


Миллий клиринг маркази марказлашган клирингни амалга оширади, Марказий контрагент функциясини бажаради ҳамда ҳисоб-китоб банки сифатида ўз фаолиятини юритади. 

Клирингни амалга ошириш дейилганда тузилган битимлар бўйича клиринг қатнашчиларининг ўзаро талаб-мажбуриятларини аниқлаш ҳамда  хисобга олиш тушунилади.

Марказий контрагент эса молия бозорида тузилган ҳар бир битимлар бўйича харидор учун сотувчи ва сотувчи учун харидор вазифасини бажарадиган молия ташкилотидир. Унинг асосий мақсади битимлар бўйича мажбуриятларни бажармаслик хавфи, яъни кредит рискини камайтириш, юзага келувчи дефолт ҳолатларини бошқариш орқали тузилган битимлар бўйича ҳисоб-китоблар якунланишини кафолатлаш ҳамда неттинг қилиш орқали клиринг иштирокчиларининг транзакцион харажатларни камайтиришдир. 

Шунингдек, мазкур қарор билан 2024 йил 1 майга қадар Миллий клиринг марказига ҳисоб-китобларни амалга ошириш учун Марказий банкда вакиллик ҳисобварағи очилиши белгиланган бўлиб, унинг ижросини таъминлаш доирасида қуйидаги ишлар амалга оширилди:

  1. Миллий клиринг маркази тузилган битимлар бўйича ҳисоб-китоб банки сифатида функцияларини бажариши учун Марказий банкда сўмда вакиллик ҳисобрақами очилди. 
  2. “Миллий клиринг маркази” фаолиятининг асосий жиҳатларини инобатга олган ҳолда  Ўзбекистон республикаси валюта биржасининг дастурчилари томонидан RoBUST автоматлаштирилган банк тизими ишлаб чиқилди ва Марказий банкнинг телекоммуникация тармоғига ҳамда банклараро тўлов тизимига (RTGS) уланди.
  3. Миллий клиринг марказининг Марказий контрагент сифатидаги функциясини сифатли амалга ошириш, клиринг тизимига мижозларнинг ишончини ошириш, капитал бозорида тузилган битимларнинг ижроси барқарорлигини таъминлаш ҳамда дефолт ҳолатлари таъсирини юмшатиш мақсадида кафолат фонди ташкил этилди.  

Бундан ташқари, давлат қимматли қоғозлари бозорида ҳисоб-китобларни «T+2» режимида жорий қилиш ҳамда қимматли қоғозлар ва пул маблағларини олдиндан депонентга қўйиш талабларини бекор қилиш орқали клирингнинг янги моделини жорий қилишни назарда тутадиган норматив-ҳужжатлар лойиҳалари ишлаб чиқилмоқда. Бу эса, ўз навбатида, молиявий бозорнинг жозибадорлигини, шаффофлигини ошириб, жаҳон стандартларига мувофиқлаштириш орқали хорижий инвесторларни жалб қилишга ҳамда уларга янада қулай шароитлар яратилишига ўз хиссасини қўшади. 

Поделиться новостью

Контакты пресс-центра

Копировать весь текст