Валюта курслари:
ЎзРВБда очилиш аукциони курси:
1 USD = UZS ()
16.01.2026
ЎзРВБда ОАВ вакиллари билан COFFEE & TALK учрашуви ўтказилди
Ўзбекистон республика валюта биржаси (ЎзРВБ)да оммавий ахборот воситалари вакиллари ва Бош директор Р.Р.Усманов иштирокида Coffee & talk форматида учрашув бўлиб ўтди. Мазкур тадбир медиажамоатчилик билан очиқ ва тизимли мулоқотни йўлга қўйиш, биржа фаолиятида шаффофликни ошириш ҳамда валюта бозорининг амал қилиш механизмлари бўйича тушунчалар бериш мақсадида ташкил этилди.
Учрашув норасмий, бироқ профессионал муҳитда ўтди ва икки қисмдан иборат бўлди.
Тадбирнинг биринчи қисми доирасида ЎзРВБ раҳбари биржанинг жорий фаолияти бўйича батафсил маълумот берди. У ўз маърузасида биржа савдолари қандай ташкил этилиши ва ўтказилиши, бозор иштирокчилари учун бугунги кунда мавжуд бўлган молиявий инструментлар, шунингдек хорижий валюталар курси шаклланишинг асосий тамойиллари ҳақида сўз юритди. 
Маъруза давомида таъкидланганидек, ЎзРВБнинг ўз мутахассислари томонидан ишлаб чиқилган ва ривожлантириб борилаётган замонавий биржа инфратузилмаси савдоларни ўтказиш, битимларни қайта ишлаш ва клирингни амалга ошириш, market data маълумотларини узатиш, шунингдек таҳлилий маҳсулотларни шакллантиришни таъминлайди. Инфратузилмани ривожлантиришга нисбатан комплекс ёндашув бозор ва савдо иштирокчилари талабларига жавоб берадиган барқарор ҳамда шаффоф жараёнларни шакллантириш имконини беради.
Клиринг ва ҳисоб-китоб масалаларига алоҳида эътибор қаратилди. Клиринг хавф-хатарларни камайтириш, савдо жараёнларининг барқарорлигини таъминлаш ва бозор инфратузилмасига бўлган ишончни шакллантиришда ҳал қилувчи аҳамиятга эга.
ЎзРВБни ривожлантиришнинг устувор йўналишлари қаторида давлат қимматли қоғозлари бозори индексларини жорий этиш, биржа сегментларининг умумий ҳолатини акс эттирувчи композит индексни шакллантириш, шунингдек market data ва таҳлилий маҳсулотларни янада ривожлантириш ва кенг тарқатиш белгиланди. Ушбу инструментлар бозор иштирокчилари ҳамда оммавий ахборот воситаларининг хабардорлик даражасини оширишга, шунингдек бозор жараёнларини таҳлил қилишда объектив ва тизимли кўрсаткичларга таянишни таъминлашга хизмат қилади.
Тақдимот якунида савол-жавоб сессияси ўтказилиб, унда оммавий ахборот воситалари вакиллари томонидан билдирилган саволларга Биржа раҳбари томонидан бевосита батафсил ва атрофлича изоҳлар берилди.
Учрашувнинг иккинчи қисми доирасида ЎзРВБ мутахассислари томонидан ишлаб чиқилган Rhombus валюта савдолари савдо платформаси тақдимоти бўлиб ўтди. Тақдимот чоғида платформанинг функционал имкониятлари, ички тузилиши, ишлаш механизми ҳамда савдо операцияларини реал вақт режимида амалга ошириш жараёни батафсил ёритилди.
Биржа механизмларининг амалий жиҳатларини янада яхшироқ тушуниш мақсадида иштирокчилар учун симуляцион савдолар ташкил этилди. Ушбу жараён доирасида журналистлар Rhombus савдо платформасининг симуляторида трейдер сифатида иштирок этиб, биржа операцияларини амалга ошириш орқали савдо жараёнларининг ички ишлаш тамойиллари билан бевосита танишиш имкониятига эга бўлдилар.
Учрашув якунида мазкур турдаги тадбирлар Ўзбекистон республика валюта биржасининг ривожланиш стратегиясида муҳим ўрин тутиши қайд этилди. Шу билан бирга, келгусида Биржа оммавий ахборот воситалари ва экспертлар жамоатчилиги билан ўзаро ҳамкорликда бундай учрашувларни тизимли равишда ўтказиш орқали молиявий саводхонлик даражасини ошириш ҳамда молия бозори инфратузилмасига бўлган ишончни мустаҳкамлашга қаратилган ишларини давом эттириш кўзда тутилади.





