Валюта курслари:

ЎзРВБда очилиш аукциони курси:

1 USD = UZS ()


24.07.2025

ЎзРВБда Ўзбекистон ипотекани қайта молиялаштириш компаниясининг корпоратив облигациялари билан РЕПО синов савдолари ўтказилди  

Ўзбекистон республика валюта биржаси (ЎзРВБ) платформасида Ўзбекистон ипотекани қайта молиялаштириш компаниясининг корпоратив облигациялари билан РЕПО битимлари бўйича синов савдолар амалга оширилди. Ушбу янги молиявий инструмент Ўзбекистон Республикаси Президентининг “Уй-жой ва ипотека бозорини янада ривожлантиришга оид қўшимча чора-тадбирлар тўғрисида”ги Фармонини амалга ошириш доирасида жорий этилди.  


Президент фармонида нималар кўзда тутилган?   

Юқоридаги Президент фармони уй-жой қурилишини молиялаштиришнинг янги механизмларини ривожлантириш ва замонавий ипотека қимматли қоғозлари бозорини шакллантиришга қаратилган. Ҳужжат билан қуйидагилар кўзда тутилган:   

  • ЎзРВБ платформаси орқали Марказий банк ва тижорат банклари ўртасида ипотека облигациялари, шунингдек, Ўзбекистон ипотекани қайта молиялаштириш компаниясининг облигациялари билан РЕПО операцияларини ўтказиш;  
  • “Ўзбекистон ипотекани қайта молиялаштириш компанияси” АЖ ҳузурида ипотека облигацияларини чиқаришга ихтисослаштирилган махсус ваколатли ташкилот фаолиятини йўлга қўйиш;   
  • ипотека облигацияларини чиқариш амалиётини тартибга солишни назарда тутувчи «Тартибга солиш қумдони» махсус ҳуқуқий режимини жорий этиш;  
  • ипотека кредитлари тўплами билан таъминланган ва юқори ликвидли активлар сифатида тан олинадиган ипотека облигацияларини чиқариш.   

Ушбу чора-тадбирлар ипотека кредитларига кўпроқ инвестицияларни жалб қилиш, банкларнинг хавф-хатарларини камайтириш ва уй-жой сотиб олишни барча фуқаролар учун янада қулай қилишга қаратилган.   

ЎзРВБнинг роли   

Фармонга асосан, “Тартибга солиш қумдони” доирасида Марказий банк ва тижорат банклари ўртасида Ўзбекистон ипотекани қайта молиялаштириш компаниясининг облигациялари билан РЕПО операцияларини ЎзРВБ платформасида ўтказишга рухсат берилди.   

Шу тариқа, ЎзРВБ иштирокчиларга ипотека облигациялари гарови остида вақтинчалик ликвидликни жалб қилиш имконини берувчи операцияларни ўтказиш учун асосий инфратузилма платформаси бўлиб хизмат қилади.   

Илк натижалар   

Инфратузилманинг тайёрлигини текшириш ва янги механизмларни синовдан ўтказиш мақсадида ЎзРВБ платформасида Ўзбекистон ипотекани қайта молиялаштириш компаниясининг облигациялари билан РЕПО битимлари бўйича синов савдолари ўтказилди. Мазкур савдолар молия бозорининг янги ипотека инструментларини жорий этишга тайёрлигини амалда тасдиқлади.   

Инвесторлар учун қўшимча мотивация   

Фармонда инвесторлар учун жозибадор шароитлар яратишга алоҳида эътибор қаратилган. Жумладан, Ўзбекистон резиденти ва норезиденти бўлган юридик шахсларнинг 2030 йил 1 январгача чиқарилган Ўзбекистон ипотекани қайта молиялаштириш компаниясининг облигациялари бўйича олинган даромадлари, қимматли қоғозларнинг бутун муомала даври давомида фойда солиғидан озод этилди. Бунда, мазкур имтиёз ушбу облигацияларнинг бутун муомала даври мобайнида олинган барча даромадларга татбиқ этилади.   

Ушбу солиқ имтиёзи молиявий инструментнинг даромадлилигини ошириш ва бозордаги талабни рағбатлантиришга имкон яратади.    

Хулоса   

ЎзРВБ пратформасида Ўзбекистон ипотекани қайта молиялаштириш компаниясининг облигациялари билан ўтказилган РЕПО синов савдолари молия бозорини ривожлантириш, инвеститсиялашнинг янги инструментларини яратиш ва уй-жой қурилишини қўллаб-қувватлаш вазифасини амалга оширишда муҳим босқич бўлди. ЎзРВБ бундан кейин ҳам янги молиявий инструментларни жорий этиш ва уларнинг самарали муомалада бўлиши учун инфратузилмани ривожлантиришга алоҳида эътибор қаратишда давом этади. 

Поделиться новостью

Контакты пресс-центра

Копировать весь текст