Валюта курслари:

ЎзРВБда очилиш аукциони курси:

1 USD = UZS ()


02.12.2024

Янги имкониятлар ва мослашувчан шароитлар: ЎзРВБдаги асосий ўзгаришлар

Ўзбекистон республика валюта биржаси (ЎзРВБ) 2024-2028 йилларга мўлжалланган ривожланиш стратегияси доирасида бир қатор янгиликлар жорий этди. Ушбу ўзгаришлар валюта спот-бозори ва РЕПО операциялари бозорига таалуқли бўлиб, савдо иштирокчиларига янги инструментлар ва янада мослашувчан шароитларини таклиф этмоқда. Янгиликлардан кўзланган мақсад — битимларни тузиш самарадорлигини ошириш, иштирокчилар учун имкониятларни кенгайтириш ва тизимни халқаро стандартларга мувофиқлаштириш.

Валюта спот бозоридаги ўзгаришлар

Янги EUR/UZS_TOD инструменти

Савдоси якуни бўйича клиринг жараёни бир иш кунида амалга ошириладиган евро/ўзбек сўми жуфтлиги бўйича янги инструмент жорий этилди. Яъни, савдо иштирокчилари аввал валютани сотиб олишлари ва савдо куни якунида, ҳисоб-китоб сессияси давомида битим бўйича тўловларни амалга оширишлари мумкин бўлди. Савдолар соат 10:30дан 15:00гача давом этади, ҳисоб-китоблар эса 16:00гача якунланади. Бу савдо иштирокчилари учун молиявий активларни бошқаришнинг тезкорлиги ва қулайлигини таъминлайди.

RUB/UZS_TOD инструменти савдоси билан боғлиқ ўзгаришлар

Эндиликда дилерлар савдо тизимига буюртма киритишдан олдин рублдаги маблағларни ЎзРВБ ҳисобварағига ўтказишлари лозим. Ушбу ўзгариш операциялар самарадорлигини оширишга қаратилган.

Мазкур янгилик савдо иштирокчиларига битимларни тез ва қулай тарзда амалга оширишга, ликвидликни бошқаришга ва харажатларни камайтиришга кўмаклашади ҳамда биржа савдо жараёнининг барқарорлигини оширади.

Давлат қимматли қоғозлари билан РЕПО битимларини тузиш қоидаларига ўзгартиришлар

РЕПО бозорида бир неча муҳим ўзгаришлар рўй берди:

  1. Халқаро стандартларига асосан ҳисоб-китоблар

Қайта сотиб олиш қийматини (битимнинг иккинчи қисми) ҳисоблаш формуласи энг илғор жаҳон амалиётига мослаштирилди. Ҳисоб-китоблар дисконтлаш ставкасини ҳисобга олган ҳолда РЕПО суммасига асосланади, бу эса савдо иштирокчиларининг пул маблағларини ўз вақтида ва тўлиқ қайтармаслик билан боғлиқ хавф-хатарларини камайтиради.

  1. Тизимдан ташқари битимлар учун қуйидаги мослашувчан шартлар тақдим этилди:
  • муддати 1 кундан 365 кунгача бўлган, шунингдек кунлик РЕПО битимларини тузиш имконияти;
  • 0 % дан 30% гача бўлган дисконт ставкасини қўллаш имконияти;
  • томонлар келишувига кўра манфий, мусбат ёки нолга тенг РЕПО ставкаларини қўллаш имконияти (ушбу ўзгариш натижасида савдо иштирокчилари РЕПО операциялари орқали нафақат пул маблағларини жалб қилиш, балки ДҚҚни сотиб олиш имкониятига эга бўладилар).
  • Битимнинг иккинчи қисмини ижро этиш тугалланиш санаси соат 11:30 да амалга оширилади.

Ушбу ўзгаришлар иштирокчиларга ликвидлиликни бошқариш ва операцияларни жорий бозор шароитларига мослаштириш учун кенгроқ имкониятлар яратади.

РЕПО битими - бир томоннинг қимматли қоғозларни бошқа томонга уларни маълум муддатдан сўнг олдиндан белгиланган нархда сотиб олиш мажбурияти билан сотиши бўйича битим ҳисобланади. Бу ликвидлик ёки сармоя жалб қилишда фойдаланадиган қимматли қоғозлар билан таъминланган қисқа муддатли кредитнинг бир туридир.

    1. Тизим доирасидаги савдоларда тузиладиган битимларга оид ўзгаришлар
    • Савдолар юқори тезлик ва шаффофликни таъминлайдиган узлуксиз икки томонлама аукцион усулида ўтказилади.
    • Битимлар бўйича 1, 3, 7, 14 кун ёки “кун ичида” стандартлаштирилган РЕПО муддатларини қўллаш имконияти;
    • Дисконт ставкаси 5% даражасида стандартлаштирилди, бу, ўз навбатида, ҳисоб-китобларнинг барқарорлигини таъминлайди;
    • Битимнинг иккинчи қисми ҳисоб-китоб куни соат 11:30да ижро этилади.
    • Бозор ликвидлигини ошириш ва барқарорлигини таъминлаш мақсадида маркет-мейкерларга қулай шароитлар яратилди.

    Ушбу янгиликлар РЕПО битимларини тузиш жараёнини шаффоф ва қулай қилади, дилерларга ўзларининг молиявий стратегияларини оптималлаштириш учун инструментларни тақдим этади.

    Хулоса

    ЎзРВБда жорий этилаётган янгиликлар мослашувчан, замонавий ва самарали молиявий тизимни яратиш йўлидаги муҳим қадамдир. Янги инструментлар, янгиланган қоидалар ва халқаро стандартларнинг жорий этилиши бозор иштирокчилари учун қулайликларни ошириш билан бирга, биржага бўлган ишончни орттиради. Буларнинг барчаси Ўзбекистон молиявий инфратузилмасининг фаол ривожланишига ҳисса қўшади, савдо иштирокчиларига активларни самарали бошқариш учун янги имкониятларни тақдим этади.

    Поделиться новостью

    Контакты пресс-центра

    Копировать весь текст